– Хәерле көн, миңа!

Хәерле көн, сиңа!

Хәерле көн, безгә!

Хәерле көн, сезгә!

1. Җыр тыңлау: «Солдатлар» (К. Булатова сүзләре, М. Минһаҗев көе).

Экранда хәрби һөнәр ияләре сурәтләнгән рәсемнәр күрсәтелә.

2. Шигырь уку: «Кем ул солдат?», Вәсимә Хәйруллина («Куанычым-багалмам», 93 бит).

3. Шигырьнең эчтәлеге буенча әңгәмә.

– Шигырьдә нинди һөнәр ияләре турында сөйләнә?

– Кайсы һөнәр иясе нинди эшләр башкара?

– Ә солдат нәрсә эшли?

– Машина, танкны кем йөртә?

– Самолетны, диңгездә корабль йөртүчеләрне ничек атыйлар?

– Солдат – нинди ул? (Батыр, куркусыз, кыю, көчле һ.б.)

Тәрбияче балаларга тиздән зур бәйрәм – әтиләр, абыйлар, бабайлар бәйрәме – ил сакчылары көне җитәчәге турында әйтә. Без яшәгән илнең бик зур булуы, кешеләр тыныч яшәсен өчен аның чикләрен җирдә дә, күктә дә, диңгездә дә сакларга кирәклеге, солдатлар, матрослар, очучылар, танкистлар, чик сакчыларының илебезне саклавы турында сөйли.

4. «Әйе-юк» уен күнегүе.

– Самолётны кем йөртә, матросмы? (Юк, очучы йөртә.)

– Самолётны кем йөртә, очучымы? (Әйе, очучы йөртә.)

– Корабльне кем йөртә, очучымы? (Юк, матрос йөртә.)

– Корабльне кем йөртә, матросмы? (Әйе, матрос йөртә.)

– Танкны кем йөртә, матросмы? (Юк, танкист йөртә.)

– Танкны кем йөртә, танкистмы? (Әйе, танкист йөртә.)

– Чикләрне кем саклый, матросмы? (Юк, чик сакчысы саклый.)

5. Динамик пауза: «Бүген бәйрәм» уены (Н. Гайсин шигыре буенча)

Байрак элдек без

аяк очларына басып, кулларны югары күтәрү,

Бүген урамга,

кулларны төшерү,

Безнең Армия

кулларны як-якка җәю,

Көне булганга.

кул чабу,

Әйдә, зур бәйрәм,

кулларны өскә күтәрү,

Шатлык белән кил,

елмаю,

Сине каршылый

кул чабу,

Бөтен туган ил.

кулларны як-якка җәю,

Батыр абыйлар

баш бармакны күрсәтү,

Торалар сакта.

төз басу,

Ватаныбызның

кулларны як-якка җәю,

Чикләрен саклап.

кул чабу.
6. Балалар әтиләренең армиядә вакытта төшкән фотолары буенча сөйлиләр. Үскәч, әтиләре кебек булырга теләүләрен әйтәләр.

– Мин, әтием кебек, солдат булам.

– Минем әтием очучы. Мин дә үскәч очучы булам.

– Минем әтием моряк булган. Минем моряк буласым килә.

– Ә мин, әтием шикелле, машина йөртүче (шофер) булам һ.б..

7. «Ул нинди?» үстерешле уены.

Тәрбияче берәр төрле хәрби һөнәр атамасын (мәсәлән: чик сакчысы) әйтеп, балага туп бирә. Бала шул сүздән сүзтезмә (батыр чик сакчысы) ясап, тупны кире тәрбиячегә тапшыра.

Шөгыльне, бәйрәм уңаеннан, әтиләргә, бабайларга бүләк открыткалар ясау белән дәвам итәргә мөмкин. Шулай ук Н. Гайсинның «Бүген бәйрәм!» («Куанычым-багалмам», 237 бит), С. Рәхмәтулланың «Солдат» («Куанычым-багалмам», 94 бит) шигырьләрен яттан өйрәнергә тәкъдим ителә.